ZO KAN SI

GFYO timi cu Global Falam Youth Organization tinak a si ih, leitlun hmunza kip ih a um mi Falam a duhdawttu mino pawl hmunkhat te ih khua le ram hrang hnatuan tlang ding ti tumtahnak thawn Feb 20,2011 ah online(Skype) ah relkhawmnak nei in rak din mi Pawlkom a si. Nunphung kilkhawi cawisan le Khawtlang ṭhansohnak lam hi a hleice in kan ṭuan mi a si. Pakhat le pakhat simawk phah, zirhawk phah, thurawn awk phah le thazang pe aw phah ih hmai nor vivo ding kan si.

GFYO Thutawi

ZIANG KAN TUAH

Mipi ih in duhsaknak zarah ram hrangah mi harsa bomnak in siseh, zatlang hman mi sizung coka, ti inn saknak in siseh, ram le miphun cawisangtu thiam hleice pawl upat sunlawihnak in siseh, calai fingkhawinak hrang online laica zirnak in siseh, mino pakhat le pakhat karlak ah theihthiam awknak le duhdawtnak a leng thei nak ding ah Youth Conference tuahnak in si seh, thansonak nak a phunphun kan tumtahnak vekin hlawhtling ten kan rak tuan suak thei a si.

Cangvaihnak

MIPI HNEN SAWMNAK

GFYO cun miphun le biaknak thleihdannak a nei lo ih khua le ram thansonak hrang pum a pek aw duhtu zaten sangka ong in kan lo hmuak ringring asi. GFYO hlawhtling thei nak ding hrang ah ruahnak in si seh, sum le saw in si seh, thlacam sak nak in si seh in tangpi camcin ding khal zangfah kan lo dil asi. GFYO sungah- tutiang active zet in a tel rero mi ram pawl cu- USA, Canada, England, Sweden, Switzerland, Norway, Singapore, Australia, Korea ram pawl a um.

Contact us

2016 GFYO President ih Annka le Thucah Tawi

Khuazaramkip ih um duhdawtmi pi le pu, nu le pa, u le nau pawl nan zaten Global Falam Youth Organization (GFYO) hmin in cibai ka lo buuk hai a si! Nan nitin nuntu khuasaknak ah le nan pumcawmnak hrangih nan khuakhaan lairelnak ah hlawhtlinnak, tlawngkainak ah fimthiamnak le taksa thinlung thlarau damnak famkim cu nan zate parah kan biak kan Pathian in lo pek hai hraam ko seh tin thlazaa ka cam a si! GFYO cu a liamcia 2011 ah ram le miphun tthansonak ding hrang ih mah le ti theinak zawn ih a zuam tu leilung kil li ih um mino hrekkhat pawl in an rak dinh mi a si. GFYO hnattuannak ah miphun, biaknak, numi le mipa thleidannak um lo in zo khal khua le ram hrangah zawnruahnak thinlung thawn a zuam duh tu hmuahhmuah zalen zet ih an tel theinak hmun a si.

Tuisunni tiang GFYO ih kaihruainak in khuatlaang remhtthatnak ah siseh, tilian le thlisia ruangih harsatnak tong kan Chin unau pi pawl bawmnak ah siseh, Falam sizung hrangah an ttul zet mi coka sak nak ah siseh, harhdamnak thawn pehpar in medical check-up tuahnak tivek le a dangdang sunloih upat tlak kan Falam mi le sa sung in thiamsang pawl upat peknak ah siseh tin mah le ti thei tawk ciar ih in rak ttanpi nak nan nihlawh, nan sumpai, nan ruahnak tthattha pawl ruangah GFYO pi ih a tumtah mi pakhat hnu pakhat tuahsuak vivo an si ti cu kan zaten kan thei thluh ko ding. Cuvek thotho in tuihlan ih in ttanpi zo bangtuk in hmailam caan khal ah kan ram le miphun tthansonak ding hrangah nanmah le nan ti thei tawk ciar in in rak ttanpi ringring hrih ko uh tiah ka lo sawm hai duh a si. Kan san hi IT san a si zo vek in hlanlai vek ih a thla le kum rei ih cakuat le phone biak awk a si nawn lo. Ram leng um mino tamsawn cun computer kan nei thluh ti sehla ka palh lo tluk a si ding. Computer nei lo hmanh ah phone le tablet sung in email ngan dan, thuthang siar dan, ca siar dan le ca ngan dan tivek pawl cu kan thiam thluh thlang. Cutluk ih a tlaancak mi kan san ah nangmah le keimah in kan ram le kan miphun duhdawtnak kan nau le thinlung sung ah kan thunlut lo a si ahcun mawhphurhnak tumpi kan tong thei. Cuti a si ruangah kan mah le kan thiam mi (talent) cio hmang khawm in kan ram le kan miphun remttha sal uh siah tiah tangdor zet in ka lo sawm hai duh a si.

Kanmah EC members pawl lawng nih kan ttuan a si ahcun kan miphun ih 1% hrang hmanh ah tthathnemnak le ttangkainak kan tuah sak thei lo men ding. Sihmanhsehla, phunpi unau pawl nih in ttanpi a si ahcun 50% hrawng tel cu kan bawm thei hai ding a si. A dang 25% cu an mah ten an bawm awk ve a ttul ding ih a dang 25% lala cu a cozah ih hnattuan a si ve ruangah tuihlan hnak in tuihnu ah kan ram khal a ttha vivo ding ih kan miphun pi khal kan nuam phah vivo lai ding a si. Atuvek ih hmunkhat te ah ttangrual in hna kan ttuan tikah kan cak ih tum deuh le kau deuh in hna kan ttuan thei a si timi cu tui hlan kumnga sung ih kan cangvai dan zoh in nan thei cio ko ding. Kan umnak hmun le hma cu dang awk hman seh, kan ei in mi khal dang awk hman seh, kan sinfen khal dang awk hman seh, kan fimthiamnak le kan zirnak khal dang awk hman seh kan ram le miphun kan duhdawtnak cu a bang awk ko ruangah kan mah le kan ti thei nak zawn cio in thazaang pe aw tonh dingah Bawikhrih hmin in ka lo sawm hai a si. GFYO hrangah ruahnak in siseh, sumpai in siseh, nihlawh in siseh, thlacamnak in siseh, thazaang peknak in siseh nangmah le na ti thei tawk te in in telpi ringring dingah lo sawm phah in ka thu ka cem ter a si. Siartu nan zate parah Pathian thlawsuahnak a thar in um hraam ko seh! Ka lungawi!

Mai Esther Hrang Lian Dim(USA), GFYO President, 24 May 2016.

Projects kan theh zo mi pawl Hightlight

Pathian zangfahnak in projects tluangten kan thehsuak zo mi pawl tla kan nei thei ruangah Sumpai le thazang ih in bawmtu sungkhat, unau, rualpi, members pawl le ram le miphun a duhdawttu nan zaten parah tampi lungawinak kan nei timi kha kan lo theiter duh. Nan mah bawmnak ruangah tluangten a hnuai ih projects hi kan theh thei nak a si.

Sayakyi Vankyi Zin (3 July 2012)

Feet (440) sau ih karbak-169 a um mi Sayakyi Van Kyi zin hi No.1 BEHS, Falam tlawnginn pi fehnak lamzin pakhat a si. Cozah lamin budget an pek thei lo ruangah mipi lamih harsatnak ruatin himi lamzin rem dingah kan rak tumtah. Azate’n kykat ting(37) lenglo cem in tuah suah a si. 3 July 2012 ah Lamzin onnak le hminpeknak cu sunglawi zet in tuahsuak a si. In dampi laitu Sayakyi Van Kyi upat peknak ah “ Sayakyi Vankyi Zin”tiah hmin kan rak pek.

Lian-rih khua pawl bawmnak (17 April 2014)

GFYO pawl hin Fangfai dip 20 le Siti cuai 30 in bawmnak an pe ih, Falam Pacang No Pawl in an inn balnak ding hrang le an khua ihsi khuathar thawnnak ding hrang, moṭaw nikhat sung an hlan sak ih hlei ah fehsuksonak le a ṭul dang pawl bawmnak an nei. Hi bawmnak an pek rual ah Singapore ih um Zangiat mino pawl in Ks 595000 in bawmnak an rak pek ve.

More Info

Ramleng Fimzirnak Seminar (May, 2013)

May, 2013 ah Falam khua sung um mi Nurse kai rero laitu le mino hrekhat hnenah Ram leng ih scholarships thawn tlawngkai pehdaan ding Seminar kan tuah sak thei. Himi thusimtu cu GFYO palai Mai Sui Cer Chin a si ih amah hi Singapore ah Nursing thawn tlawngṭheh mi a si.

Falam No.3 Primary Tlawng-inn Toilet Remnak ( Sep 24, 2011)

Harhdamnak hrangah a thupi zet mi pakhat cu dailen inn thianfainak hi a si. Falam khua sungih No.3Primary tlawngInn dai-lennak pawl hi hardamnak lam in zoh tikah rem le a thar in sak tul dinhmun an si. Tlawngta pawlih harhdamnak hrangah a ṭhat lo ruangah a thar in sak ding kan rak tumtah. Sumpai cemliam ding mi hrang Fund hawlnak ah United Kingdom ih um GFYO palai Salai Van Cung Lian cu Great North Run tlanzuamawknak ah a rak tel. Culawng siloin, Lailun Fundation, R am leng ih um laimi pawlkom pawlih bomnak thawn a ṭul mi dai-len inn kan sak suak thei.

Falam Sizung hrang Ti-inn Dawlsak (August 2013)

Falam khua hi kan theih cio bangin tidai lam ah kan har zet. Ṭhal caan hrimhrim ah in ding hrang rori hman tidai a har caan um ṭheu. Kan Falam sizung pi rori khal tidai an har zet. A hleice in Sizung mina kiltu pawl hrangah rawl suannak hrang rori khal tidai an nei lo ṭheu. Curuangah Ti-inn sakin tidai kan khawl thei asile ṭhal caan tidai har caan ah kan nuam deuh ding ti ruahsannak thawn Ti-inn ( fts 4 X 4) cu August, 2013 ah kan rak dawl.

Kum (70) tlun Nu le Pa Upat sunloihnak (May, 2011)

May 13, 2011, FBA Hall, Falam ah GFYO Onnak le Falam khua sungih um kum(70) tlun in dampi laitu Nu le Pa pawl upat peknak le laksawng peknak khal kan nei cih

OUT PARTNERS

NGO pawlkom dang pawl thawn Lairam thansohnak ding hrang hna kan tuan tlangmi tampi a um zo. Kan parntner pawl tla a hnuai ah langternak kan nei. GFYO thawn project a tuah duhtu hrangah ban phar in kan lo hmuak ringring asi.