GFYO Onnak Puai le NUPA Sunloihnak tuah(May 13, 2011)

18th May 2011

by: Sen Hngilh Piang

Kandung May ni 13 ah khan Global Falam Youth Organization (GFYO) timi, Leitlun pum huap Falam mino pawlkom thar pakhat on nak puai le kum upa Nu le Pa sunloihnak puai cu Rev. Thang Tsin Memorial Hall, FBA, Falam ih an tuah thu Chin World palai hnen ihsi thu dawn a si.

GFYO onnak puai hi Rev. Nun Lian Thang (GS, FBA) in electric-cet hmet nak thawn on nak a tuah sak ih, Rev. Van Luai Thang (GBC) in GFYO hrangah thlacamnak thawn hlannak a nei.

Hi onnak puai ah GFYO ih an hnatuannak hmaisabik a si mi kum 80 tlun lam khuanu khuapa pawl hnenah laksawng pekhlannak khal an nei cih a si. Falam ih GFYO palai a si mi Naing Naing cun, “Kan sawm mi kum 80 tlun lam khuanu khuapa pawl hi vengtin ih upa tuanvo neitu pawl hnen ihsi cazin kan lak khawm mi a si ih, laksawng kan pek mi an zaten mipum 75 an kim thei. Kan zumnak hnakin an rak tam nasa, anmah le an cakvak zet lai hai fawn, Laimi pawl hi Pathian thlawsuah kan co nasa zumhnakin kan san a rak sau ngaingai,” tiah a sim.

Ramsung ramleng ih um Chin Calai ngainatu mino pawl khalin khuanu khuapa sunloihnak puai hrang biazai (18) an rak phuah thei ih, cui sunloihnak biazai pawl siarnak tla neih cih a si.

Himi thu thawn pehpar aw in GFYO Hotu sang – Salai Phun Hre Mang cun, “Nu le Pa pawl sunloihnak puai GFYO in kan tuah duh san nak bik cu, kum upa zo kan Nu le kan Pa pawl sunloih upatnak kan pek men lawng siloin, an hnen ihsi thlawsuah lak thiam ding zirh awk duhnak, Laimi hi Pathian thlawsuah nunkhua sau nak kan co zia pawl langter phah nak hrang khalah a si,” tiah Chin World hnenah a sim.

Pawlkom thar pakhat a si mi Global Falam Youth Organization (GFYO) hi kandung 20 February 2011 (Chin National Day) ni ah leitlun ram dangdang ih um Falam mino pawlin kan ram le miphun hrangah mino dinhmun in hna kan tuan ve ding timi hmuitin nak thawn an rak din mi a si. Mirang in Global Falam Youth Organization (GFYO) ti a si ih, Chin tong cun – Leitlun Falam Mino Pawlkom (LFMP) tiah hi pawlkom hi a hmin pek a si.

GFYO Sungtuan Salai Za Kung Lal in, “A tu kan dinhmun hi ‘Introduction Period’ lawng kan si lai ih, tuvek in thil tete kan tuah phah ah mino dang pawl, tel thei hrih lo mi ram dangdang ih um pawl kan sawm bet vivo ding. Kan khua le kan ram hrang pawlkom dang pawl thawn khal a tul dan ih zirin pehtlaihnak tuah in hnatuan tlang dan hawl vivo ding tumtahnak kan nei,” tiah a ti.

GFYO hi Hotu ah – B.A (Thang), Salai, Hotu sang – Salai Phun Hre Mang, Sungtuan – Salai Za Kung Lal leh Sungtuan bawmtu – Salai Cung Mi Mang pawl hohatnak in CEC mino (20) rual pawl ih an rak thok mi a si. USA, Canada, Norway, Sweden, Switzerland, Singapore, Yangon, Kalay leh Falam khua ih um mi mino pawl thawn an rak din khawm.
GFYO pehtlaihnak a tuah duhtu hrangah…
An email: leitlunfalammino@gmail.com ah pehtlaih theih an si.

Posted in Cangvaihnak.

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>