LIAN-RIH KHUA GFYO IN BAWM; HNGILH MI KHUA AN IANG

By Van Bawi Lian

Falam Peng Lian-rih khua pawl cu Leitlun Falam Mino Pawlkom (GFYO) pawl in bawmnak an nei.

Global Falam Youth Organization (GFYO) le Falam Pacang No pawl kom aw in Falam peng, Lian-rih khua pawl cu fangfai, siti le an inn lo thiar pawl cu April17, 2014 ah an bawm. 

‘An khua hi thawn ṭheh rori cu an duhnak a si nan tufang an dinhmun ah bawmtu an nei ngaingai lo, bawmnak a mal tuk. Tui an khua thawnnak dingah le tidai a thleng lo ih, phur a ti rit zet fawn. Curuang ah a ṭihnungnak tlang lam inn pawl lawng hi tukum ṭhal sung ah an thawn thei ding.’ tiah GFYO sungṭuan 3. Salai Michael Naing cun a sim.

GFYO pawl hin Fangfai dip 20 le Siti cuai 30 in bawmnak an pe ih, Falam Pacang No Pawl in an inn balnak ding hrang le an khua ihsi khuathar thawnnak ding hrang, moṭaw nikhat sung an hlan sak ih hlei ah fehsuksonak le a ṭul dang pawl bawmnak an nei. Hi bawmnak an pek rual ah Singapore ih um Zangiat mino pawl pawl in Ks 595000 in bawmnak an rak pek ve.

Lian-rih Khua Din Hmun

Lian-rih khua hi Falam ihsin peng riat (8), Ruun tipi tlun, tlang kap ih um mi khua a si. Inn khi 28, Tlawng saza zirhtu pawl umnak quarter 7 um in, mipum 164 pawl an um. Lai tlawng a um ih tlawngta mipum hleisarih (17), phun 6-10 tiang tlawngta hleinga (15) hrawng an um.

Feh suksonak hrangah Jeep moṭaw tleng asi ruangah Jeep moṭaw cu a feh tlang thei.

Ruun tlun tlang ram ih um an si ruangah kum tinte duhvek in an loram an thar ṭha lo. An mai ei khawpkham fang tluk ngah ih khawsa mi an si.

Kum 1999 ah an khua umnak nasa zet ih a rak min ruangah, tui an khua umnak hmun, an khua hlun thawn pengkhat tluk a hlatnak ah hin kum 2000 ah an rak ṭhawn.


Ziang A Cang

October 8, 2013 ah an khua cu lei a kak ciamco. An khaw kiang ih limmin ciamco ruangah an khua sung zaten lei a kak thluh. Minung umnak hrang ih ṭihnung a si ruangah an khua ihsin peng 3 tluk a hlatnak Cong Kua ah um hmun thar khuar sal dingin Dec. 2, 2013 ah khua an hal sal. Tui an umnak an khua ah kum 13 lawng an um man.

An khua khing mi pawl hi tuikum furpi tiang umnak ding hrang ahcun ṭihnung a si tiih an hmuh ruangah tuikum 2014 furpi, ruah a tlak hlan ih ṭhawn ṭheh ṭul mi a si.

Bawmnak An Tlasam

An khua a min ih umnak hrang ṭihnung tiih an ruah ruangah an khua bawi cun Falam Khayaing ukchukzi zung ah sim thannak a nei. An ni pawl cun tlun lam in inn balnak ah kyat 300,000 an rak bawm.

Tui an khuathar hrangah Hidro hrang bawmnak pek an tum ih Sipin lam khal in tidai laknak ding hrang bawm an tum thu an rak rel dah tithu cu a um nan, a tak ih tuahsak mi cu tutiang zianghman a um hrihlo.
GFYO hohanak ih tuahmi Falam Youth Conference, 2013 December 28 – 2014 January 2 tiang tuahnak ihsin Lian-rih khua hrang puan zun 30, Secondhand hnipuan pawl le Ca ngannak thilri pawl an rak bawm.
Bawmnak Ngaingai An Ṭul

Lianrih Khua pawl ih an harsatbik mi pawl cu, Inn thiar, (Inn pawl hi “Lung inn” lawnglawng a si ih thiar harsa), Tidai laknak, (Tlangpar ih toh ding a si ruangah peng (8) tluk hla (Lumte khuathar lan) lawngah ti a um hmun pawl ih lak ding an si.

Falam peng ihsin peng 8 tluk lawng a hlatnak ih um Lian-rih khua pawl cun hngilh zomi khua bangin bawmtu ṭulin an vavai. An umnak ding hrang dinhmun ṭihung ankhua ihsin khua dang ih an vaihnak ding hrangah bawmtu ngaingai neilo in, an khua a kak ihsin tuni tiang an um hrih lai.

Lian-rih khua ih bawm an ṭul zia thuhla pawl khal tlang cabawm ah thlah a sinan bawmnak ding auaw an dawng ngaingai lo.

lianrih-khua

GFYO, Falam Pacang No Pawlkom lawng ih bawmnak lawngin an khuathar ih dinhmun thar le umtu khawsatnak hrang an nuntu khawsatnak bulhram ṭohnak a tlak lo.

Leitlun hmun zakip ih a thleng mi Chin mi pawl ih bawmnak ṭul in Lian-rih khua pawl cun nitin, ruahsannak thar thawn an caan an hmang a si.

Hi Thuthang pawl hi a hmun roriih bawmnak a petu GFYO Sungṭuan 3. Michael Naing ih reportnak pawl telh cih ih ngan mi a si.

http://chinlandtoday.info/lian-rih-khua-gfyo-in-bawm-hngilh-mi-khua-an-iang/

Posted in Cangvaihnak.

Leave a Reply

Your email address will not be published. Required fields are marked *