2014-2015 GFYO President Ih Thucah

Lamhla lam nai ih um duhdawtmi phunpi unau zaten GFYO hmin in cibai kan lo buuk asi. nan tuah nan tuan mi cio ah damnak cahnak thawn hlawhtlinnak thluasuah hmuifu kan pa Pathian in lo pek hngai hramseh ti ah thlaza kan cam. GFYO timi cu leitlun hmunza kip ih a um mi Falam mino pawl khua le ram thansonak hrang ah hmunkhat te ih hnatuan tlang thei nak ding hrang ih rak din mi pawlkom asi.

Santiluan khal a thleng awk vingvo vek in tulai kan laimi tampi a hlei ce in kan mino tampi cu leitlun hmunza kip ah feh in hnatuan phunkim tuannak in siseh zirnak phunkim nei in siseh kan um tampi thlang a si. Kan pupa pawl in thi le hnai thawn an rak kilhim mi kan khua kan ram le te le fa hrang ih in roh ta mi kan nunphung pawl hi a tu mino nang le kei ih fingkhawi ding tuan vo kan neih lawng si lo in kan te sinfa san ah cun a tu hnak in a thang so mi ram nuam ramtha kan lairam a si thei nak ding ah rotha roh thei tu ding tuanvo nang le kei in kan nei a si.

Mipi ih nan tanpinak le nan thlacamsak nak thawng in a liam cia mi kum hnih thum sung ah GFYO in khal khua le ram hrang ah mi harsa bomnak in siseh, zatlang hman mi sizung coka, ti inn sak nak in siseh, ram le miphun cawisangtu thiam hleice pawl upat sunlawih peknak in siseh, calai fingkhawinak hrang online laicazir nak in siseh, mino pakhat le pakhat karlek ah theihthiam awk nak le duhdawtnak a leng thei nak ding ah youth conference tuahnak in si seh , thansonak nak a phunphun kan tumtahnak vekin hlawhtling ten kan rak tuan suak thei asi.

Kan umnak bangrep lo in kan tuah kan tuan mi dang dang cio hman ning la khoi nah kan um timi hnak in ziang mi kan tuah timi a thupi sawn ruangah kan khua le kan ram kan duhdawtnak thinlung cio kha lungrualnak ah kan hmang pei ih kan tumtahnak hlawhtling ding in tuantlang cio ding ah ka lo sawm. GFYO cun miphun le biaknak thleihdannak a nei lo ih khua le ram thansonak hrang pum a pek aw duhtu zaten sangka ong in kan lo hmuak ringring asi. GFYO hlawhtling thei nak ding hrang ah ruahnak in si seh, sum le saw in si seh, thlacam sak nak in si seh in tangpi camcin ding khal zangfah kan lo dil asi. Pahtian in thlasuah lo pek hngai hram seh. Ka lungawi

SALAI CUNG NAWL THAWNG
2014-2015 GFYO President

Posted in Cangvaihnak.

Leave a Reply

Your email address will not be published. Required fields are marked *