2016 GFYO President ih Annka le Thucah Tawi

Khuazaramkip ih um duhdawtmi pi le pu, nu le pa, u le nau pawl nan zaten Global Falam Youth Organization (GFYO) hmin in cibai ka lo buuk hai a si! Nan nitin nuntu khuasaknak ah le nan pumcawmnak hrangih nan khuakhaan lairelnak ah hlawhtlinnak, tlawngkainak ah fimthiamnak le taksa thinlung thlarau damnak famkim cu nan zate parah kan biak kan Pathian in lo pek hai hraam ko seh tin thlazaa ka cam a si! GFYO cu a liamcia 2011 ah ram le miphun tthansonak ding hrang ih mah le ti theinak zawn ih a zuam tu leilung kil li ih um mino hrekkhat pawl in an rak dinh mi a si. GFYO hnattuannak ah miphun, biaknak, numi le mipa thleidannak um lo in zo khal khua le ram hrangah zawnruahnak thinlung thawn a zuam duh tu hmuahhmuah zalen zet ih an tel theinak hmun a si.

Tuisunni tiang GFYO ih kaihruainak in khuatlaang remhtthatnak ah siseh, tilian le thlisia ruangih harsatnak tong kan Chin unau pi pawl bawmnak ah siseh, Falam sizung hrangah an ttul zet mi coka sak nak ah siseh, harhdamnak thawn pehpar in medical check-up tuahnak tivek le a dangdang sunloih upat tlak kan Falam mi le sa sung in thiamsang pawl upat peknak ah siseh tin mah le ti thei tawk ciar ih in rak ttanpi nak nan nihlawh, nan sumpai, nan ruahnak tthattha pawl ruangah GFYO pi ih a tumtah mi pakhat hnu pakhat tuahsuak vivo an si ti cu kan zaten kan thei thluh ko ding. Cuvek thotho in tuihlan ih in ttanpi zo bangtuk in hmailam caan khal ah kan ram le miphun tthansonak ding hrangah nanmah le nan ti thei tawk ciar in in rak ttanpi ringring hrih ko uh tiah ka lo sawm hai duh a si. Kan san hi IT san a si zo vek in hlanlai vek ih a thla le kum rei ih cakuat le phone biak awk a si nawn lo. Ram leng um mino tamsawn cun computer kan nei thluh ti sehla ka palh lo tluk a si ding. Computer nei lo hmanh ah phone le tablet sung in email ngan dan, thuthang siar dan, ca siar dan le ca ngan dan tivek pawl cu kan thiam thluh thlang. Cutluk ih a tlaancak mi kan san ah nangmah le keimah in kan ram le kan miphun duhdawtnak kan nau le thinlung sung ah kan thunlut lo a si ahcun mawhphurhnak tumpi kan tong thei. Cuti a si ruangah kan mah le kan thiam mi (talent) cio hmang khawm in kan ram le kan miphun remttha sal uh siah tiah tangdor zet in ka lo sawm hai duh a si.

Kanmah EC members pawl lawng nih kan ttuan a si ahcun kan miphun ih 1% hrang hmanh ah tthathnemnak le ttangkainak kan tuah sak thei lo men ding. Sihmanhsehla, phunpi unau pawl nih in ttanpi a si ahcun 50% hrawng tel cu kan bawm thei hai ding a si. A dang 25% cu an mah ten an bawm awk ve a ttul ding ih a dang 25% lala cu a cozah ih hnattuan a si ve ruangah tuihlan hnak in tuihnu ah kan ram khal a ttha vivo ding ih kan miphun pi khal kan nuam phah vivo lai ding a si. Atuvek ih hmunkhat te ah ttangrual in hna kan ttuan tikah kan cak ih tum deuh le kau deuh in hna kan ttuan thei a si timi cu tui hlan kumnga sung ih kan cangvai dan zoh in nan thei cio ko ding. Kan umnak hmun le hma cu dang awk hman seh, kan ei in mi khal dang awk hman seh, kan sinfen khal dang awk hman seh, kan fimthiamnak le kan zirnak khal dang awk hman seh kan ram le miphun kan duhdawtnak cu a bang awk ko ruangah kan mah le kan ti thei nak zawn cio in thazaang pe aw tonh dingah Bawikhrih hmin in ka lo sawm hai a si. GFYO hrangah ruahnak in siseh, sumpai in siseh, nihlawh in siseh, thlacamnak in siseh, thazaang peknak in siseh nangmah le na ti thei tawk te in in telpi ringring dingah lo sawm phah in ka thu ka cem ter a si. Siartu nan zate parah Pathian thlawsuahnak a thar in um hraam ko seh! Ka lungawi!

Mai Esther Hrang Lian Dim(USA), GFYO President, 24 May 2016.

Posted in Cangvaihnak.

Leave a Reply

Your email address will not be published. Required fields are marked *

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>